�鶹��ý�����

Bydd y cwrs hwn yn rhoi sylfaen academaidd gadarn i chi yn Gymraeg (dwy ran o dair o'r cwrs) a'r cyfle i astudio modiwlau ymarferol ac academaidd mewn newyddiaduraeth. Byddwch yn ennill dealltwriaeth o agweddau sylfaenol ar newyddiaduraeth a hynny heb gau'r drws ar yrfa yn un o'r meysydd lu lle mae gradd yn y Gymraeg yn ddymunol. Gyda chyfuniad o sgiliau ysgrifennu academaidd a phroffesiynol, mae'r gyrfaoedd posibl yn cynnwys cysylltiadau cyhoeddus, marchnata, llywodraeth leol, darlledu a newyddiaduraeth, cyhoeddi, addysgu, y celfyddydau a threftadaeth.

Mae BA Cymraeg gyda Newyddiaduraeth yn darparu sylfaen academaidd gadarn mewn Cymraeg (dwy ran o dair o’ch cwrs) ynghyd â'r cyfle i astudio modiwlau ymarferol ac academaidd mewn newyddiaduraeth (traean o’ch cwrs). Dysgwch am ofynion creiddiol newyddiaduraeth, heb gau'r drws ar y llu o feysydd eraill sy’n gofyn am radd yn y Gymraeg. I rai sy’n meddu ar gyfuniad o sgiliau uchel mewn ysgrifennu academaidd a phroffesiynol, mae gyrfaoedd posib yn cynnwys newyddiaduraeth, darlledu, cysylltiadau cyhoeddus, marchnata, cyfieithu, llywodraeth leol, cyhoeddi, addysgu, y celfyddydau a threftadaeth.

Iaith fyw y presennol yn hytrach na chrair o'r gorffennol yw'r Gymraeg ym Mangor. Yma cewch gyfle nid yn unig i astudio a mwynhau un o lenyddiaethau Celtaidd hynotaf y byd, ond cyfle hefyd i ddilyn modiwlau mwy ymarferol eu gogwydd a fydd yn baratoad ardderchog ar gyfer gyrfa a swydd. Bydd y cwrs hwn yn eich galluogi i ymchwilio’n annibynnol, i feddwl yn wreiddiol, i ddod i adnabod llenyddiaeth Gymraeg a diwylliant Cymru mewn dyfnder ac i feistroli gwahanol gyweiriau’r iaith. Os dymunwch, bydd cyfle i chi ddilyn eich diddordebau creadigol o dan arweiniad ysgrifenwyr a beirdd profiadol. Cewch ymwybyddiaeth hefyd o’r Gymraeg mewn cyd-destunau rhyngwladol ehangach. Beth yw perthynas y Gymraeg ag ieithoedd eraill y byd? Sut mae ffawd yr iaith yn cymharu ag ieithoedd fel Basgeg a Gwyddeleg? Sut mae llenorion a beirdd Cymru wedi ymateb i themâu byd-eang fel caethwasiaeth, yr Holocost a her ecolegol y byd modern diwydiannol?��

Pam dewis Prifysgol Bangor ar gyfer y cwrs?

• Canolfan ac iddi enw da drwy'r byd ar gyfer astudio Cymraeg ac Astudiaethau Celtaidd.
• Astudio gyda darlithwyr sydd â phrofiad blaengar o newyddiaduraeth ddigidol broffesiynol.
• Astudio yng Ngwynedd, cartref sector deinamig o ran diwydiannau creadigol a chyfryngau Cymru.
• Darlithwyr profiadol, blaengar mewn newyddiaduraeth ddigidol broffesiynol.

Opsiynau Cwrs Ychwanegol

Rhan o gryfder Newyddiaduraeth ym Mangor yw’r cyfle i ddysgu gan ddarlithwyr sy’n meddu ar brofiad ymarferol yn y maes. Arweinir y ddarpariaeth cyfrwng Cymraeg gan Dr Ifan Morgan Jones, cyn-olygydd gwefan Golwg360 a sylfaenydd Nation.Cymru. Bydd cyfle i ganolbwyntio ar sawl agwedd berthnasol yn ystod y cwrs, e.e. newyddiaduraeth ddigidol, newyddiaduraeth amlgyfrwng, newyddiaduraeth brint, llunio eitemau nodwedd, moeseg newyddiaduraeth a chyfraith cyfryngau.��

Mae’r dysgu yn Adran y Gymraeg drwy gyfrwng darlithoedd, seminarau, tiwtorialau a gweithdai. ��Byddwch yn gwneud traethodau, amrywiol ymarferion a thasgau wythnosol, gwaith darllen a pharatoi ar gyfer seminarau. Mae'r asesiad yn gyfuniad o’r gwaith cwrs ac arholiadau, gyda rhai modiwlau wedi’u hasesu’n llwyr ar sail gwaith cwrs. Bydd eich modiwlau bob blwyddyn yn gyfwerth ag 120 credyd.��

Beth fyddwch chi’n ei astudio ar y cwrs yma?

Mae’r flwyddyn gyntaf yn gyfle i adeiladu ar eich profiadau ac i agor drysau newydd, e.e. trafod yr iaith mewn cyd-destunau sy’n ymwneud â’i hanes a’i chyflwr heddiw, ystyried gwahanol gyweiriau’r iaith lenyddol, dysgu sgiliau beirniadol newydd ac ymateb yn wreiddiol i lenyddiaeth.��

Cewch ddewis helaeth o fodiwlau yn eich ail a'ch trydedd flwyddyn, e.e. y nofel o Daniel Owen i Llwyd Owen, y theatr Gymraeg o Saunders Lewis hyd at Aled Jones Williams, barddoniaeth fodern ac awdlau’r eisteddfod, dramâu teledu Meic Povey, Dafydd ap Gwilym, y Mabinogion – neu beth am astudio diwylliant Cymraeg Cymry America a hyd yn oed holi “Beth yw Llenyddiaeth?” Datblygir hyder a hyfedredd ieithyddol mewn modiwl fel Ymarfer Ysgrifennu a sgiliau defnyddiol yn Medrau Cyfieithu.��

Yn y drydedd flwyddyn cewch lunio traethawd hir ac ymchwilio i bwnc diddorol. Ymhlith y pynciau diweddar y mae unigolion fel Dafydd ap Gwilym, Kate Roberts, Mihangel Morgan, Angharad Tomos, Caryl Lewis, Meic Stevens a Geraint Jarman a meysydd fel ecofeirniadaeth, rhywedd a thrawsrywedd, iaith Sir Benfro, llenyddiaeth Gymraeg a chaethwasiaeth, llên a cheffylau a phêl-droed mewn llenyddiaeth.��

Modiwlau ar gyfer y flwyddyn academaidd gyfredol

Mae’r rhestrau modiwlau ar gyfer eich arwain yn unig ac fe allant newid. Cymerwch olwg ar yr hyn y mae ein myfyrwyr yn ei astudio ar hyn o bryd ar tudalen Modiwlau Cymraeg gyda Newyddiaduraeth BA (Anrh).

Mae cynnwys y cwrs wedi’i nodi i’ch arwain yn unig ac fe all newid.

• Stiwdio radio gydag offer proffesiynol
• Ystafelloedd golygu sain – Adobe Audition
• Ystafelloedd golygu fideo – Final Cut Pro a Final Cut Express ar gyfer cyfrifiaduron Apple Mac
• Offer fideo a radio ar gyfer gwaith maes teledu a radio
• Ystafell gyfrifiaduron amlgyfrwng.

Costau Cyffredinol yn y Brifysgol

Myfyrwyr Cartref (DU)

• Cost cwrs israddedig llawn-amser yw £9,250 y flwyddyn (2025/26).
• Y ffi ar gyfer pob blwyddyn dramor integredig yw £1,385 (2025/26).
• Y ffi ar gyfer blwyddyn mewn diwydiant integredig fel rhan o'r cwrs yw £1,850 (2025/26).

Mwy o wybodaeth am ffioedd a chyllid i fyfyrwyr Cartref (DU).

Myfyrwyr Rhyngwladol (yn cynnwys yr UE)

• Ffioedd Dysgu Myfyrwyr Rhyngwladol
• Costau Byw ac Ysgoloriaethau Myfyrwyr Rhyngwladol

Costau Ychwanegol
Mae yna hefyd rai costau ychwanegol cyffredin sy'n debygol o godi i fyfyrwyr ar bob cwrs, er enghraifft:

• Os dewiswch chi astudio dramor neu gymryd y Flwyddyn Profiad Rhyngwladol fel rhan o'ch cwrs.
• Os ydych chi'n mynd i'ch Seremoni Raddio, bydd cost llogi gŵn (£25- £75) a chost am docynnau i westeion ychwanegol (tua £12 yr un).

Costau ychwanegol cwrs-benodol

Yn dibynnu ar y cwrs rydych chi'n ei astudio, efallai y bydd costau ychwanegol cwrs-benodol y bydd gofyn i chi eu talu. Gellir rhoi'r costau hyn mewn tri chategori:

1. Costau Gorfodol: mae'r rhain yn gysylltiedig â modiwl craidd neu orfodol penodol y mae'n ofynnol i chi ei gwblhau i gwblhau eich cymhwyster e.e. teithiau maes gorfodol, gwisgoedd i fyfyrwyr ar leoliad, gwiriad gan y Gwasanaeth Datgelu a Gwahardd (DBS).
2. Costau Angenrheidiol: efallai na fydd pob myfyriwr yn cael y costau hyn, a bydd yn amrywio yn dibynnu ar y cwrs e.e. aelodaeth o gorff proffesiynol, teithio i leoliadau, meddalwedd arbenigol, cyfarpar diogelu personol.
3. Costau Dewisol: mae'r rhain yn dibynnu ar eich dewis o fodiwlau neu weithgaredd, ac fe'u dangosir er mwyn rhoi syniad ichi o'r costau dewisol a allai godi i sicrhau bod cymaint o wybodaeth â phosibl ar gael i chi cyn i chi wneud eich dewis. Gall y rhain gynnwys digwyddiadau graddio ar gyfer eich cwrs, teithiau maes dewisol, tripiau Wythnos Groeso.

Gofynion Cyffredinol y Brifysgol

I astudio cwrs gradd mae’n rhaid i chi gael isafswm o bwyntiau tariff UCAS. Am eglurhad manwl o bwyntiau tariff UCAS, ewch i .

Rydym yn derbyn myfyrwyr â phob math o gymwysterau a chefndiroedd ac yn ystyried pob cais yn unigol.

Mae’n rhaid i bob ymgeisydd gael sgiliau sylfaenol da ond mae’r Brifysgol hefyd yn gweld pwysigrwydd sgiliau cyfathrebu a thechnoleg gwybodaeth.��

Mae’n bolisi gan y Brifysgol i ystyried ceisiadau gan ddarpar fyfyrwyr anabl yn yr un modd â; phob cais arall.

Rydym yn ystyried ceisiadau gan fyfyrwyr hŷn sy’n medru dangos fod ganddynt y gallu a’r ymrwymiad i astudio rhaglen prifysgol. Bob blwyddyn rydym yn cofrestru nifer sylweddol o fyfyrwyr hŷn. Am fwy o wybodaeth am astudio fel myfyriwr aeddfed, ewch i��adran Astudio ym Mangor.����

Ni fu erioed adeg fwy cyffrous i astudio’r Gymraeg ym Mangor. Ni fu ychwaith gymaint o alw am weithlu a all ddefnyddio’r Gymraeg ar lefelau proffesiynol uwch. Mae’r nod yn glir, y mae wedi ei osod gan Lywodraeth Cymru – miliwn o siaradwyr Cymraeg erbyn 2050 a Chymru ddwyieithog yng ngwir ystyr y gair.��

Wrth anelu am y nod hwnnw bydd angen mawr am raddedigion hyderus eu Cymraeg, rhai fydd yn gallu defnyddio eu sgiliau iaith mewn ffyrdd hyblyg, rhai fydd yn gallu meddwl yn ddadansoddol drwy gyfrwng yr iaith a’i defnyddio – ar lafar ac yn ysgrifenedig – mewn sefyllfaoedd gwaith amrywiol.��

Mae llwyddiant proffesiynol rhyfeddol ein myfyrwyr ym maes gwaith – a’u gyrfaoedd amrywiol – eisoes yn profi pa mor gwbl berthnasol yw’r cwrs hwn i ofynion y Gymru gyfoes. Mae cyfran ohonynt yn cael eu denu i fyd addysg, i fod yn athrawon cynradd ac uwchradd, yn brifathrawon, yn swyddogion addysg ac yn gyfarwyddwyr addysg. Aeth eraill i fyd addysg bellach ac i fod yn ddarlithwyr mewn prifysgolion. Mae dysgu Cymraeg i oedolion hefyd yn faes allweddol. Mae’r byd teledu a’r cyfryngau digidol a phrint – gan gynnwys canolfan y BBC ym Mangor – yn cynnig trawstoriad o swyddi diddorol a denwyd cyn-fyfyrwyr eraill at faes cyhoeddi llyfrau, ysgrifennu creadigol a sgriptio teledu, cysylltiadau cyhoeddus a marchnata. Mae’r galw yn parhau hefyd am weinyddwyr a swyddogion dwyieithog ar gyfer llywodraeth leol. A heb bresenoldeb graddedigion Cymraeg Bangor byddai’r diwydiant cyfieithu yn un pur wahanol. Ac mae gan raddedigion y cyfnod presennol hefyd bob hawl i anelu’n uchel. Llyfrgell Genedlaethol Cymru, Y Theatr Gymraeg Genedlaethol, Cwmni Da (un o gwmnïau cynhyrchu mwyaf Cymru), Gwasanaeth Cofnodi a Chyfieithu Senedd Cymru a Chyngor Ynys Môn – beth sy’n gyffredin rhyngddynt? Mae graddedigion Cymraeg Bangor wedi cyrraedd brig eu gyrfaoedd proffesiynol ynddynt ac wrth y llyw ym mhob un ohonynt!��

Cyfleoedd ym Mangor

Mae Gwasanaeth Sgiliau a Chyflogadwyedd y Brifysgol yn cynnig amryw o adnoddau i’ch helpu i gyflawni eich amcanion ar ôl graddio.

Rhaglen Interniaeth Prifysgol Bangor

Mae Prifysgol Bangor yn cynnal cynllun interniaeth â thâl yn adrannau academaidd a gwasanaethau’r Brifysgol.

Gwirfoddoli

Mae gwirfoddoli yn ehangu eich profiadau ac yn gwella eich cyflogadwyedd. Cewch fwy o wybodaeth am wirfoddoli ar wefan .

Gweithio tra'n astudio

Mae TARGETconnect yn hysbysebu swyddi lleol, cenedlaethol a rhyngwladol i raddedigion, cyfleodd profiad gwaith ac interniaethau a chyfleon gwirfoddol.

Adroddiad Cyflawniad Addysg Uwch (HEAR)

Ceir pob myfyriwr sy’n graddio adroddiad terfynol HEAR. Mae’r adroddiad yn rhestru holl gyflawniadau academaidd ac allgyrsiol fel bod darpar gyflogwyr yn ymwybodol o’r sgiliau ychwanegol rydych wedi eu hennill tra yn y Brifysgol.

Mae opsiwn 'gyda Blwyddyn Sylfaen' ar gael ar gyfer y cwrs hwn. Gwnewch gais am��Cymraeg i Ddechreuwyr.