Mae Ysgol Busnes Bangor yn defnyddio ei harbenigedd mewn dadansoddeg data i helpu cwmnïau Cymreig i gael mewnwelediadau gwerthfawr a thyfu busnesau cynaliadwy.
Bydd tîm o arbenigwyr mewn dadansoddeg data a chyllid o Ysgol Busnes Bangor yn datblygu, dros y chwe mis nesaf, gwell dealltwriaeth o sut mae busnesau Gogledd Cymru yn defnyddio dadansoddeg data ar hyn o bryd i lywio penderfyniadau a’u cynlluniau ar gyfer y dyfodol i ehangu a datblygu eu galluoedd o ran dadansoddi data. Mae’r cynllun yn bosib diolch i gyllid sylweddol gan gynllun Cymorth Arloesedd Clyfar Hyblyg (S_FIS) Llywodraeth Cymru, sy’n cefnogi Ymchwil, Datblygu ac Arloesi a yrrir gan alw.
Mae adroddiadau niferus o’r Deyrnas Unedig ac yn fyd-eang yn cyfeirio at y twf anferth yn y defnydd o ddadansoddeg data, ond hefyd yn nodi prinder sgiliau yn yr agwedd hon ar sgiliau rheoli busnes, rhywbeth mae Prifysgol Bangor eisoes yn ceisio mynd i’r afael ag ef drwy gynnig gradd mewn dadansoddeg data i fusnes.
Dywedodd yr Athro Adrian Gepp o Brifysgol Bangor, “Bu ffrwydrad yn y defnydd o ddadansoddeg data dros y degawd diwethaf, a thra bod rhai busnesau yn y rhanbarth yn arwain y ffordd o ran defnyddio pŵer y data sydd ganddynt, credwn y gall llawer mwy o fusnesau yng Ngogledd Cymru wneud y mwyaf o’r newidiadau a'r cyfleoedd a ddaw yn sgil y twf anferth yma mewn technoleg data i ddiogelu eu busnes at y dyfodol."
Mae’r tîm yma yn Ysgol Busnes Bangor wedi gweithio ar draws y byd yn y maes hwn, felly roeddem yn awyddus i ddod o hyd i ffordd o drosglwyddo’r profiad sydd gennym boed hynny yn academaidd neu yn y byd go iawn i mewn i broses ymchwil gydweithredol a fydd yn y pen draw yn gwella gweithrediadau busnesau Cymreig trwy eu helpu i ddefnyddio llawn potensial eu data ar gyfer datblygu cynaliadwy a mantais gystadleuol.
Gan weithio ochr yn ochr â Dr Laurence Jones a Dr Heather He, nod yr Athro Gepp yw ymgynghori â busnesau Cymru ar ddau fater allweddol:
- Eu defnydd o a'r heriau wrth ddadansoddi data
- Eu hystyriaethau a'u pryderon Amgylcheddol, Cymdeithasol a Llywodraethu (ESG).
Mae ystyriaethau Amgylcheddol, Cymdeithasol a Llywodraethu, neu ESG fel y’i gelwir yn eang, yn ganolog i fusnesau am sawl rheswm, yn enwedig twf a chynaliadwyedd yn y dyfodol. Gall deall yn well sut mae data ESG yn cael ei gasglu a’i dystiolaethu fod yn hollbwysig o ran cyllid cyhoeddus a buddsoddiad preifat.
Rydym am feithrin cysylltiadau â chymaint o arweinwyr busnes â phosibl ynglŷn â’r heriau a’r cyfleoedd y mae dadansoddi data’n cyflwyno iddynt, a rhoi cipolwg i fusnesau ar sut y gallant ddefnyddio dulliau newydd ac arloesol o harneisio eu data i yrru penderfyniadau strategol. Yn y pen draw, ein nod yw grymuso busnesau i ddefnyddio dadansoddeg data i ysgogi twf ac arloesedd yn economi Cymru.
Cymerwch ran!
Yn dilyn y broses ymchwil, bydd papur gwyn ar ddefnyddio a datblygu dadansoddeg data yng Ngogledd Cymru yn cael ei rannu gyda'r busnesau sydd wedi cymryd rhan.
Os ydych chi'n fusnes yng Ngogledd Cymru ac eisiau cymryd rhan er budd eich busnes, mae'r tîm eisiau clywed gennych chi! Cysylltwch ag Adrian Gepp a.gepp@bangor.ac.uk am sgwrs anffurfiol.
