�鶹��ý�����

Doeddwn i ddim yn gwybod beth i'w ddisgwyl pan adawais y Swistir yn 2006 i astudio Llenyddiaeth Saesneg gydag Ysgrifennu Creadigol ym Mhrifysgol Bangor. Dim ond am fyr dro y bûm yno ar gyfer diwrnod agored, ac yr oedd fy meddwl yn llawn delweddau o dref fechan yn swatio rhwng y mynyddoedd a'r môr. Roeddwn i’n teimlo wedi fy nghaethiwo rhwng y cyfarwydd a'r anghyfarwydd, y person oeddwn i yn ôl adref a'r person y fyddwn i yn y lle newydd hwn, ond roeddwn i'n siŵr o un peth. Roeddwn i eisiau rhoi'r cyfle gorau posibl i mi fy hun i ddod yn awdur, ac roedd Bangor yn ymddangos fel lle da i ddechrau.

Fel mae'n digwydd, roeddwn i'n gywir. Ym Mangor y dysgais i ysgrifennu barddoniaeth pur dda a llunio stori â llygad mwy beirniadol, ac er fy mod yn gwerthfawrogi’r sgiliau hynny’n aruthrol hyd heddiw, nid dyma’r unig beth a ddysgais yno. Bangor yw ble roeddwn i’n teimlo’n ddigon cyfforddus i ddod o hyd i mi fy hyn a chwrdd ag eraill fel fi, gan ffurfio cyfeillgarwch a fyddai’n para degawdau. Dyma lle cwrddais â'm darpar ŵr, a lle y gwnes i gadarnhau fy awydd i barhau i weithio tuag at fy nod o fod yn awdur cyhoeddedig, ni waeth beth.

Wedi'r cyfan, sut y gallai rhywun fethu â chael eu hysbrydoli pan fo cymaint o harddwch gwyllt o’u cwmpas? Weithiau, roeddwn i'n teimlo fy mod yn byw ar gyrion y byd, yn swatio mewn cildraeth cudd a hwnnw’n llawn o ryw fath arbennig o hud a lledrith, a’r hud hwnnw wedi'i wneud o ddŵr llwyd-ddur, cymylau anferth a sisial sibrydion. Hyd heddiw, mae gen i hen gopïau o Seren sy’n cynnwys rhai o fy ngherddi natur.

Pan ddaeth yr amser i wneud penderfyniad am fy nyfodol, dewisais aros ym Mangor am flwyddyn arall ac astudio MA mewn Ysgrifennu Creadigol. Yn 2010, ysgrifennais am fy mhrofiad ym Mangor i gystadleuaeth Stori Fer i Fyfyrwyr Rhyngwladol, a drefnwyd gan Brifysgol Newcastle. Cyhoeddwyd y stori honno, “Puzzled”, ym mlodeugerdd 2011, Crossing the Lines.

Ar ôl i mi orffen fy MA, ceisiais bopeth o fewn fy ngallu i ddod o hyd i swydd a oedd yn ymwneud ag ysgrifennu mewn rhyw ffordd. Ar ddiwedd 2011, cefais interniaeth chwe mis ym maes cyfathrebu gyda’r International Service for Human Rights yng Ngenefa, lle bûm yn helpu i baratoi a chyhoeddi eu cylchgrawn chwarterol. Roedd mynychu sesiwn o'r Cyngor Hawliau Dynol yn y Cenhedloedd Unedig ymhlith yr uchafbwyntiau.

Unwaith y daeth fy interniaeth i ben, symudais yn ôl i Ffrainc i fyw gyda fy mam. Byddai’r misoedd a dreuliais yn yr Auvergne yn helpu gyda busnes gwely a brecwast y teulu yn ddiweddarach yn fy ysbrydoli i osod rhan o'm trioleg ‘Bloodlender’ yno. Ym mis Ionawr 2012 fe wnes i orffen fy nofel gyntaf, stori gyffro ddystopaidd y gwnes i ei rhoi ar silff lyfrau o'r golwg ac nid wyf wedi edrych arni ers hynny.

Yna, ym mis Mehefin 2012, symudodd fy nyweddi a minnau i Lwcsembwrg, gwlad nad oeddem yn gwybod fawr ddim amdani ond lle’r oedd y ddau ohonom wedi bod yn ffodus i ddod o hyd i swyddi. Roedd hi bron fel mynd i Fangor unwaith eto, dechrau antur newydd gyda heriau a ffrindiau newydd. Bûm yn gweithio fel ysgrifennwr copi mewnol mewn cwmni marchnata yno am dair blynedd cyn mynd yn gyfieithydd ac ysgrifennwr copi llawrydd yn 2015.

Nid yw'r llwybr at gyhoeddi wedi bod yn un hawdd, ond nid wyf yn difaru unrhyw ran ohono. Gorffennais Mirrormind yn 2016, y nofel ffantasi i oedolion roeddwn i wedi bod yn gweithio arni ers fy mlwyddyn gyntaf ym Mangor, a dechreuais chwilio am asiant. Wedi fy annog gan adborth cadarnhaol, ysgrifennais Bloodlender yn 2017, ffantasi dywyll am ddod i oed yn sôn am gonsuriwr gwaed dihyfforddiant sy'n byw yn Vichy, Ffrainc. Ar ôl ei hailysgrifennu sawl gwaith ac ar ôl llawer o drafodaeth gyda sawl asiant, penderfynais o'r diwedd i hunan-gyhoeddi ac nid wyf wedi edrych yn ôl. Cyhoeddwyd Bloodlender ym mis Mawrth 2022 a chyhoeddwyd y dilyniant, Timebender, ym mis Mawrth 2023. Bwriedir cyhoeddi rhan olaf y drioleg, Riftmender, ym mis Ebrill 2024.  

Er nad wyf wedi bod yn ôl i ymweld â Bangor yn ystod y blynyddoedd diwethaf, rwy’n edrych ymlaen at y diwrnod y gall fy ngŵr a minnau fynd â’n plant i Fangor, dangos iddynt lle y gwnaethom gyfarfod, ac ailddarganfod y lle a helpodd i’n gwneud y bobl ydym ni heddiw.

www.zoeperrenoud.com

Mae Bloodlender a Timebender ar gael fel e-lyfrau ar Amazon, Kobo, Apple a manwerthwyr ar-lein eraill. Mae’r llyfrau clawr meddal hefyd ar gael ar Amazon a gellir eu harchebu trwy unrhyw siop lyfrau.