Â鶹´«Ã½¸ßÇå°æ

Overview

Mae'r modiwl hwn yn defnyddio repertoire yn bennaf o'r cyfnod baróc i'r cyfnod rhamantaidd cynnar i ddatblygu dealltwriaeth myfyrwyr o hanes cerddoriaeth, sut mae'n cael ei hadeiladu a sut y gellir deall yr hanes (a gweithiau cerddorol) yn niwylliant heddiw.

Dros y semester byddwch yn mynychu darlithoedd a seminarau lle byddwch yn dysgu mwy am gerddoriaeth a diwylliannau'r cyfnodau. Byddwch hefyd yn mynychu gweithdai lle byddwch yn datblygu sgiliau hanfodol mewn ymchwil a chyfathrebu.

Ar y modiwl hwn byddwch yn dysgu am weithiau pwysig a chyfansoddwyr oedd yn weithredol o ddiwedd yr 16eg ganrif hyd at ganol y bedwaredd ganrif ar bymtheg. Byddwch hefyd yn dysgu sgiliau allweddol wrth wneud ymchwil ac wrth gyfathrebu eich syniadau – ar lafar (trwy ddadleuon) ac yn ysgrifenedig.

Ar y modiwl hwn, byddwch yn datblygu eich gwybodaeth gerddorol am ystod o weithiau a chyfansoddwyr pwysig yn nhraddodiad y Gorllewin yn ogystal â'ch dealltwriaeth o'r cyd-destunau diwylliannol y daethant i fodolaeth ynddynt. Byddwch hefyd yn datblygu eich sgiliau mewn ymchwil (gan gynnwys gweithio gyda ffynonellau cynradd) ac yn cyfathrebu'ch syniadau'n effeithiol i gynulleidfaoedd.

Mae'r asesiadau ar y modiwl wedi'u cynllunio i ddatblygu eich sgiliau a'ch arbenigedd mewn sawl maes, wrth adeiladu eich gwybodaeth am hanes cerddoriaeth. Yn y seminarau byddwch yn cymryd rhan mewn dwy ddadl ar bynciau cyfoes sy'n ymwneud â'r gerddoriaeth a astudiwyd. Byddwch hefyd yn sefyll dau brawf repertoire byr ar-lein. Ac ar ddiwedd y semester byddwch yn cyflwyno traethawd byr.

Pynciau tebygol: - Palestrina ac oes aur polyffoni - Y madrigal - Dyfeisio opera - Y concerto - Merched, Cerddoriaeth a'r Baróc
- Bach - Opera fel hanes diwylliannol - Oratorio - Y pedwarawd llinynnol a’r symffoni - Schubert a'r Lied - Fanny a Felix Mendelssohn - Rhagoriaeth: Paganini, Liszt and Chopin - Verdi

Assessment Strategy

Trydydd dosbarth: D- i D+ (40%-49%) Y cyflawniad hollbwysig yw arddangos gafael sylfaenol ar hanfod y pwnc, a'r math o ddeunydd dan sylw. Fodd bynnag, bydd y marc yn cael ei gyfyngu i'r lefel hon gan bethau fel: ailadrodd gwybodaeth heb ddangos dealltwriaeth go iawn; dryswch dadl sy'n dangos methiant i ddeall y deunydd yn iawn; methu gwahaniaethu'r perthnasol oddi wrth yr amherthnasol; methu gafael mewn syniadau; cynnwys gwallau ffeithiol; sgiliau llyfryddiaethol neu droednodi difrifol ddiffygiol; mynegiant gwael; tawedogrwydd llafar; cyflwyniad bratiog.

Ail Ddosbarth Is: C- i C+ (50%-59%) Y briodwedd sy'n cyfiawnhau marciau yn y categori hwn yw’r gallu i gywain corff cymedrol o ddeunydd perthnasol a gasglwyd o ystod tra eang o destunau neu ffynonellau gwybodaeth eraill, wedi'i ddidoli mewn trefn resymegol a'i fynegi'n ddeallus. Elfennau sy'n cyfyngu'r marc i'r lefel hon yw: dadleuon afresymegol, neu ddadl sy'n ddiffygiol mewn rhyw ffordd; llyfryddiaeth neu droednodiadau cyfyngedig neu ddiffygiol; dealltwriaeth gyfyngedig o syniadau neu ddadlau; tystiolaeth gyfyngedig o wybodaeth a dealltwriaeth eang o'r pwnc; ymwneud cyfyngedig â thrafod ac ail-negodi syniadau ar lafar; tystiolaeth gyfyngedig o feddwl o ddifrif, yn hytrach na dyfalbarhad syml.

Ail Ddosbarth Uwch: B- i B+ (60%-69%) Y briodwedd nodedig yw'r gallu i lunio dadl â ffocws sydd â thystiolaeth briodol. Mae'n debyg y bydd y gwaith felly'n dangos y gallu i ddeall trafod gwaith celf ac i gymhwyso'r wybodaeth honno i wahanol weithiau; cyfleu gwybodaeth a dealltwriaeth gyffredinol o'r pwnc yn ei gyfanrwydd, ac o wybodaeth a dealltwriaeth fanylach o feysydd penodol; sgiliau llyfryddiaethol a throednodi cymwys; cyfathrebu effeithiol o syniadau a dadlau; cyfraniad meddylgar at drafodaeth lafar; y gallu i weld problemau a gwrthddywediadau wrth ddarllen ffynhonnell; sgiliau wrth arsylwi a dadansoddi. Gall gwaith Ail Ddosbarth Uwch gynnwys llawer o'r un rhinweddau a’r rhai mewn gwaith Dosbarth Cyntaf, ond byddant yn cael eu dangos ar lefel llai annibynnol, neu gall y gwaith fod yn rhagorol mewn un nodwedd Dosbarth Cyntaf ond yn sylweddol ddiffygiol mewn un arall.

Dosbarth Cyntaf: A- ac A (70%-83%) Y briodwedd wahaniaethol yw’r gallu i arddangos tystiolaeth o feddwl deallusol ac annibynnol go iawn mewn trafodaeth barhaus. Mae'n debyg y bydd gwaith ar y lefel hon yn dangos menter wrth ymchwilio y tu hwnt i'r ffynonellau amlwg; y gallu i werthuso ffynonellau’n feirniadol; trafodaeth barhaus a rhesymegol; mynegiant rhugl wrth siarad ac ysgrifennu; y gallu i ddod â deunydd o ffynonellau anghydweddol at ei gilydd; sgiliau o radd uchel wrth arsylwi a dadansoddi; y gallu i ddefnyddio gwybodaeth i oleuo testunau cerddorol; arwyddion o wybodaeth eang y tu hwnt i gyfyngiadau cul y pwnc dan sylw; y gallu i arwain trafodaeth lafar; y gallu i adnabod ac wynebu problemau yn y pwnc, gwrthddywediadau mewn testunau, neu lacunae yn y dystiolaeth sydd ar gael.

Dosbarth Cyntaf: A+ i A** (84%-100%) Mae'r gwaith ar y lefel hon yn hynod wreiddiol ac o safon sy'n cyrraedd neu'n agosáu at safonau proffesiynol. Bydd y gwaith yn arddangos holl nodweddion categori A-/A (70%-83%) mewn modd cyson, a bydd o'r fath ansawdd fel ei fod yn fwy neu lai’n barod i’w gyhoeddi neu’i ddarlledu fel ag y mae, neu fel ei fod â'r potensial i'w gyhoeddi neu ei ddarlledu gyda diwygiadau yn y cyflwyniad.

Learning Outcomes

• Arddangos gwybodaeth o weithiau penodol, arddulliau, genres, a nodweddion cerddorol mewn repertoire a gyfansoddwyd rhwng 1550 a 1850.

• Arddangos gwybodaeth o'r amgylchiadau hanesyddol a diwylliannol sy'n berthnasol i gyfansoddi a pherfformio cerddoriaeth rhwng 1550 a 1850.

• Arddangos y gallu i ymchwilio i bynciau hanes cerddoriaeth yn annibynnol.

• Cyfathrebu syniadau yn effeithiol.