Laura Miles yn cael ei hanrhydeddu â Gwobr Effaith Partneriaeth Myfyrwyr ar gyfer Mentrau Iechyd Meddwl Trawsnewidiol

Mae myfyrwraig, y mae ei mentrau wedi arwain at newidiadau ar draws y sefydliad, wedi derbyn Gwobr Effaith Partneriaeth Myfyrwyr Cenedlaethol gan y Gymdeithas Staff a Datblygu Addysg.

Derbyniodd Laura Miles, hyfforddai DClinPsy ym Mhrifysgol Bangor, y Wobr oherwydd yr effaith sylweddol a gafodd ym Mhrifysgol Bangor. Mae Laura wedi datblygu partneriaeth myfyrwyr-staff i wella’r gefnogaeth sydd ar gael gydag anawsterau iechyd meddwl ymhlith seicolegwyr clinigol dan hyfforddiant. Mae wedi sefydlu grŵp cefnogi cymheiriaid sy’n eiriol dros fyfyrwyr, gan fynd i’r afael â’r diffyg lle i drafod problemau iechyd meddwl. Cynhaliodd y grŵp, sy’n cynnwys staff a myfyrwyr, arolwg i ddeall profiadau a rhoi nifer o fentrau ar waith, gan gynnwys newidiadau mewn arferion addysgu a phrosesau sefydliadol i leihau stigma a gwella cefnogaeth.

Dywedodd y Gymdeithas am Laura, “Mae ei hymdrechion wedi arwain at newidiadau sefydliadol, gan gynnwys lle cynaliadwy i gefnogi cymheiriaid a gwaith partneriaeth parhaus i gefnogi hyfforddeion clinigol gydag anawsterau iechyd meddwl.”

Yn ogystal â’r newidiadau, mae Laura hefyd wedi datblygu fframwaith i feithrin diwylliant cefnogol a gwerthfawr fel rhan o’i thesis ar gyfer Gradd Doethuriaith Seicoleg Clinigol, y mae’n gobeithio ei weld yn cael ei gyhoeddi mewn cyfnodolyn a adolygir gan gymheiriaid. Mae hi hefyd yn gobeithio rhannu ei chanfyddiadau mewn cynadleddau, yn ogystal â datblygu pecyn hyfforddi ar gyfer rhaglenni seicoleg glinigol eraill i ddilyn, y mae Rhaglen Seicoleg Glinigol Gogledd Cymru wedi'i fabwysiadu ac a allai gael ei fabwysiadu gan eraill.

Mae’n fraint ac yn bleser mawr fy mod wedi ennill y Wobr hon, ac rwyf eisiau cydnabod rôl fy nghyd-hyfforddeion a staff y rhaglen wrth wneud y cynnydd yr ydym wedi’i wneud. Mae symud tuag at ddiwylliant lle’r ydym yn gwerthfawrogi profiad uniongyrchol o anawsterau iechyd meddwl ymhlith seicolegwyr clinigol yn newid sylweddol yn y paradeim, a fydd yn gofyn am ddewrder ac ymrwymiad parhaus gan y gymuned seicoleg gyfan. Edrychaf ymlaen at weld beth yw’r camau nesaf a sut y bydd cenedlaethau’r dyfodol o seicolegwyr dan hyfforddiant yn adeiladu ar y gwaith sydd wedi digwydd ym Mangor.

Dywedodd Beverley Pickard-Jones, sy’n Ddarlithydd yn yr Ysgol Seicoleg a Gwyddor Chwaraeon, “Roedd yn bleser cefnogi Laura wrth wneud cais am y Wobr hon. Mae cyflawniadau Laura yn dangos pa ganlyniadau gwych y gellir eu cyflawni pan fydd staff a myfyrwyr yn gweithio mewn partneriaeth, a sut y gall unigolion lywio ac arwain newidiadau.”

Ychwanegodd yr Athro Michaela Swales, Cyfarwyddwr Rhaglen, Seicoleg Glinigol Gogledd Cymru, “Rydym wrth ein bodd bod gwaith Laura ar y rhaglen wedi cael cydnybyddiaeth. Rydym yn hynod falch o Laura, mae hi wedi ymroddi trwy gydol ei hamser ar y rhaglen i sicrhau bod llais y rhai sydd â phrofiad uniongyrchol o fyw hefo anawsterau iechyd meddwl yn cael ei glywed, ei ddeall, ac yn bwysicach fyth yn cael ei ddefnyddio i wella ansawdd pob agwedd o hyfforddiant clinigol seicoleg. Rydym yn edrych ymlaen at barhau i weithio gyda Laura i ddatblygu ac ymgorffori’r gwaith y mae hi wedi’i gwblhau ar y rhaglen ymhellach.”

Bydd Laura yn cwblhau ei hastudiaethau ddiwedd mis Medi , ac yn ymuno â’r gwasanaeth Cyflyrau Cymhleth yn y Gymuned fel seicolegydd clinigol cymwys ym mis Hydref.

�鶹��ý��

Chwilio