Ymchwilwyr Prifysgol Bangor wedi eu rhestru ymysg 1% ucha’r byd

Mae pob un o’r ymchwilwyr wedi cael dylanwad sylweddol ac eang yn eu priod faes neu feysydd ymchwil. Mesurir hyn gan y nifer o weithiau mae eu papurau ymchwil yn cael eu dyfynnu mewn papurau ymchwil eraill o ansawdd uchel, gan ddangos sut y maent wedi dylanwadu ar ddealltwriaeth yn eu maes neu feysydd penodol.

“Mae dyfyniadau’n adlewyrchu’r modd y mae ymchwil yn adeiladu ar yr hyn sy’n hysbys yn barod,” esbonia’r Athro Paul Spencer, y Dirprwy Is-ganghellor sy’n gyfrifol am Ymchwil.

“Mae’r ffaith fod gennym bedwar ymchwilydd wedi’u cynnwys mewn rhestr mor uchel ei fri ac sydd mor ddylanwadol yn arwydd arall o effaith ac amlygrwydd ymchwil Prifysgol Bangor, boed yn lleol, yn genedlaethol neu’n rhyngwladol. Rydym wrth ein boddau gyda’r cadarnhad diweddaraf o’n heffaith fel sefydliad gydag enw da am ragoriaeth.”

Dywedodd David Pendlebury, sef Pennaeth Dadansoddi Ymchwil yn y Sefydliad Gwybodaeth Wyddonol yn Clarivate, “Mae’r rhestr o Ymchwilwyr y Dyfynnir eu Gwaith Amlaf yn nodi ac yn dathlu ymchwilwyr unigol eithriadol ym Mhrifysgol Bangor, y mae eu dylanwad sylweddol ac eang yn eu meysydd yn trosi i effaith o fewn eu cymuned ymchwil. Mae eu datblygiadau arloesol yn cyfrannu at fyd iachach, mwy cynaliadwy a diogel. Mae cyflawniadau’r ymchwilwyr hyn yn atgyfnerthu’r sylfaen o ragoriaeth ac arloesedd sy’n llywio cynnydd cymdeithasol.”

Y pedwar unigolyn yw:

Jane Noyes, Athro mewn Ymchwil Iechyd a Gwasanaethau Cymdeithasol yn yr Ysgol Gwyddorau Iechyd
Karen Hughes, Athro mewn Iechyd Cyhoeddus yn y Coleg Gwyddorau Dynol, sydd hefyd wedi ei chysylltu efo Iechyd Cyhoeddus Cymru
Davey Jones, Athro Gwyddorau Pridd ac Amgylcheddol ac Iechyd Cyhoeddus

��

Mark A. Bellis, Athro mewn Iechyd Cyhoeddus ac Uwch Gymrawd yn y Coleg Meddygaeth ac Iechyd, (sydd hefyd efo cyswllt gyda Phrifysgol Liverpool John Moores).

Mae’n bleser mawr bod fy ymchwil yn parhau i gael ei ddyfynnu’n aml, ac yn parhau i fod yn hynod ddylanwadol. Mae'n gydnabyddiaeth wych o'r gwasanaethau iechyd cymhwysol a'r ymchwil nyrsio yr ydym yn ei wneud yn yr Ysgol Gwyddorau Iechyd. Rwy’n ddiolchgar iawn i Brifysgol Bangor a’r Ysgol Gwyddorau Iechyd am eu cefnogaeth barhaus i’m hymchwil, ac i’m tîm am gyflawni projectau ymchwil o ansawdd mor uchel.”

Mae’n fraint cael fy nghynnwys eleni yn rhestr Clarivate o Ymchwilwyr y Dyfynnir eu Gwaith Amlaf. Rydym yn cael budd o weithio o fewn amgylchedd prifysgol sy’n cefnogi ac annog ymchwil a chydweithio o fewn gwlad fechan ond blaengar iawn. Mae cael fy nghynnwys ar y rhestr yn dangos sut mae ein hymchwil cydweithredol yn dylanwadu ar wybodaeth yn fyd-eang, yn ogystal â dylanwadu ar bolisi ac ymarfer ar draws Cymru.

“Mae ymddangos ar restr Clarivate o Ymchwilwyr y Dyfynnir eu Gwaith Amlaf yn adlewyrchu ymroddiad y technegwyr, myfyrwyr PhD ac ôl-ddoethurol, yn ogystal â fy nghydweithwyr academaidd sydd wedi gweithio gyda mi i gynhyrchu ystod eang o allbynnau ymchwil o ansawdd uchel sy’n cael effaith ystyrlon. Mae’r wobr hon i raddau helaeth yn bluen yn het y tîm. Cyflawni ISI Mynegai-H o dros 100 yw uchafbwynt y flwyddyn.”

Rwy’n falch iawn o gael fy nghynnwys ar restr Ymchwilwyr y Dyfynnir eu Gwaith Amlaf eleni. Mae’r ymchwil yr wyf yn ei gyhoeddi’n gofyn am arbenigedd unigolion o wahanol brifysgolion, o ymarferwyr yn ein gwasanaeth iechyd gwladol, i arweinwyr mewn sefydliadau rhyngwladol megis Sefydliad Iechyd y Byd. Rwy’n hynod ddiolchgar am eu cyfraniadau a’u cefnogaeth barhaus. Mae cyrraedd y rhestr o ymchwilwyr y dyfynnir eu gwaith amlaf yn ein hatgoffa bod ein gwaith yn rhan o rwydwaith ymchwil rhyngwladol, sydd â’r nod o wella iechyd a llesiant trwy fynd ar drywydd tystiolaeth, polisi ac ymarfer, a’i rhoi ar waith. Rwyf wrth fy modd bod ein cyhoeddiadau’n parhau i gyfrannu at yr ymdrech fyd-eang hon.

Portreadau

Yr Athro Jane Noyes

Fel Nyrs Gofrestredig a Nyrs Plant Gofrestredig, mae’r Athro Jane Noyes yn un o nifer fechan iawn o nyrsys ym Mhrydain sydd wedi’u derbyn yn Gymrawd Academi Nyrsio America. Mae Jane wedi datblygu enw da yn fyd eang mewn ymchwil gofal plant a gwasanaethau gofal. Mae'n fwyaf adnabyddus fel arweinydd hir sefydlog grŵp Cochrane o fethodolegwyr o fri rhyngwladol sydd wedi gwneud gwaith arloesol i ddatblygu ac egluro'r dulliau o syntheseiddio tystiolaeth ansoddol a dulliau cymysg i lywio'r broses o wneud penderfyniadau clinigol. Mae grŵp Cochrane yn arweinydd byd-eang ar gynhyrchu adolygiadau o dystiolaeth ddibynadwy gan ddefnyddio dulliau trylwyr i lywio'r broses o wneud penderfyniadau ym maes iechyd a gofal cymdeithasol. Yn aml mae sefydliadau byd-eang megis Sefydliad Iechyd y Byd a gwahanol asiantaethau Llywodraeth yr Unol Daleithiau yn galw ar Jane i gynghori ar ddulliau synthesis tystiolaeth a'u cymhwyso yn y broses o wneud penderfyniadau.

Yr Athro Karen Hughes

Mae’r Athro Karen Hughes yn Rheolwr Datblygu Ymchwil a Chapasiti (Projectau Arbennig) yn Iechyd Cyhoeddus Cymru ac yn Athro er Anrhydedd ym Mhrifysgol Bangor. Hi sy’n arwain yr Uned Cydweithio Iechyd Cyhoeddus ym Mhrifysgol Bangor, sef uned ymchwil cymhwysol rhwng y Brifysgol ac Iechyd Cyhoeddus Cymru. Mae gan Karen bortffolio ymchwil eang a diddordeb penodol mewn atal trais, profiadau niweidiol yn ystod plentyndod, defnydd o alcohol ac iechyd bywyd y nos. Mae ei gwaith yn cynnwys rhoi astudiaethau poblogaeth cenedlaethol ar waith, gwneud astudiaethau ymchwil gwreiddiol ac adolygiadau llenyddiaeth systemaidd a gwerthuso ymyraethau. Mae Karen yn gweithio gyda Sefydliad Iechyd y Byd i gefnogi’u rhaglen atal ac ymateb i drais ac mae wedi cyhoeddi ystod eang bapurau academaidd ac adroddiadau cenedlaethol a rhyngwladol sy’n cyfrannu at ddatblygiad polisi ac ymarfer iechyd cyhoeddus.

Yr Athro Davey Jones

Mae ymchwil Yr Athro Davey Jones yn canolbwyntio ar gydbwyso gwasanaethau ecosystemau ac amddiffyn iechyd dynol. I'r perwyl hwn, mae'n cydweithio â diwydiannau megis Verily Life Sciences i ddarparu datrysiadau newydd i broblemau amgylcheddol ac iechyd cyhoeddus. Datblygodd y rhaglen wyliadwriaeth genedlaethol seiliedig ar ddŵr gwastraff ar gyfer COVID-19, a gafodd ei haddasu a'i chyflwyno i ystod eang o bathogenau dynol eraill mewn lleoliad cymunedol ac amgylcheddol. Yn ddiweddar, aeth y tîm ati i ymgymryd â’r asesiad cenedlaethol cyntaf o ymwrthedd gwrthficrobaidd mewn afonydd. Mewn cyd-destun amaethyddol, mae'r tîm yn edrych ar ffyrdd newydd o wrthbwyso allyriadau nwyon tŷ gwydr a datblygu systemau amaethyddol mwy cynaliadwy ac effaith plastigion yn yr amgylchedd.

Yr Athro Mark Bellis

Mae Mark Bellis yn Athro Iechyd Cyhoeddus ym Mhrifysgol Bangor ac yn Gyfarwyddwr Ymchwil Iechyd ac Arloesiym Mhrifysgol Liverpool John Moores lle mae hefyd yn arwain Sefydliad Iechyd y Cyhoedd. Mae’n gwneud gwaith ymchwil a datblygu ar raddfa genedlaethol a rhyngwladol, mewn meysydd sy’n cynnwys profiadau niweidiol yn ystod plentyndod, alcohol, cyffuriau, iechyd rhywiol, a phenderfynyddion masnachol iechyd. Ers dros ddegawd, ef fu Pwynt Ffocws y Deyrnas Unedig (UK Focal Point) ar drais ac atal anafiadau. Mae ei waith yn cwmpasu astudiaethau ymchwil gwreiddiol, adolygiadau systemaidd, economeg iechyd a gweithrediad polisi. Mae Mark yn ymgynghorydd Iechyd Cyhoeddus cofrestredig ar gyfer y GIG yng Nghymru ac fe dderbyniodd OBE am ei wasanaethau i ofal iechyd yn 2009. Ef sy’n cadeirio y Ganolfan Cydweithredu er Atal Trais. Mae Mark wedi cyhoeddi dros 250 o bapurau academaidd a mwy na 300 o adroddiadau a llyfrau iechyd cyhoeddus cymhwysol.

�鶹��ý��

Chwilio