Carfan gyntaf o swyddogion PEQF yn graddio o Brifysgol Bangor
Graddiodd y cohort cyntaf o fyfyrwyr PEQF Heddlu Gogledd Cymru gyda chymhwyster plismona proffesiynol o Brifysgol Bangor yr wythnos hon.
Wedi'i lansio yn 2020, mae'r cydweithrediad rhwng HGC a'r brifysgol wedi caniatáu i newydd ddyfodiaid gyfuno dysgu academaidd gyda dysgu yn y gwaith.
Mae'r cynllun llwybr deuol yn cydnabod yn ffurfiol y sgiliau a welir gan weithwyr proffesiynol yr heddlu heddiw a'r galwadau a osodir arnynt gan amgylchfyd gweithio cynyddol gymhleth.
Mae'r 31 myfyriwr bellach wedi cwblhau eu cyfnod o astudio, gyda llawer yn cyflawni graddau rhagorol.
Gwnaeth Prif Swyddogion a staff uwch yr heddlu fynd i seremonïau graddio'r grŵp ar ddydd Llun 10 Gorffennaf a dydd Mawrth 11 Gorffennaf gan gynrychioli Heddlu Gogledd Cymru.
Graddio 10 o swyddogion yn seremoni dydd Llun, tra graddiodd 13 o swyddogion ddydd Mawrth. Rhannwyd y grŵp i unigolion ar lwybrau Ditectifs Mynediad Uniongyrchol ac unigolion ar lwybrau o fod yn Swyddogion Gwirfoddol i fod yn Swyddogion Heddlu llawn.
Dywedodd y Prif Gwnstabl Amanda Blakeman: "Hoffwn longyfarch ein holl raddedigion PEQF ar eu canlyniadau gwych a'u cymeradwyo nhw am eu gwaith caled a'u hymroddiad i ddysgu.
"Gwnaiff y swyddogion newydd hyn, sy'n dod gyda sgiliau amrywiol, gydweithredu gyda ni er mwyn cyflawni'r gwasanaeth gorau posibl i'n cymunedau.
"Mae plismona ynghylch gwasanaeth a dyletswydd gyhoeddus. Gwnaiff y swyddogion hyn chwarae rhan hanfodol wrth gadw trigolion ledled Gogledd Cymru'n ddiogel. Rwyf yn dymuno'r gorau iddynt oll yn eu gyrfaoedd.
"Mae bod yn swyddog heddlu yn yrfa amrywiol a gwerthfawr. Rwyf yn siŵr fod gan y swyddogion hyn ddyfodol gwych o'u blaenau."
Dywedodd Julie Brierley, Pennaeth Dysgu a Datblygu Heddlu Gogledd Cymru: "Mae gweld ein derbyniad cyntaf o swyddogion PCDA a DHEP yn graddio yn foment roedd Heddlu Gogledd Cymru a Phrifysgol Bangor yn ymfalchïo ynddi. "Maent wedi cyflawni eu cymwysterau ac wedi gwasanaethu ar ddyletswyddau rheng flaen, er heriau'r pandemig byd-eang a effeithiodd ar bawb.
"Roedd rhaid iddynt addasu a bod yn gadarn yn eu blynyddoedd cyntaf yn HGC a dylid cymeradwyo hyn.
"Mae plismona'n wasanaeth dynamig sydd ar waith mewn amgylchfyd cymhleth sy'n newid yn gyflym. Mae'n bwysig fod ein swyddogion yn derbyn yr hyfforddiant gorau posibl er mwyn eu paratoi nhw am yrfa'n gwasanaethu'r cyhoedd.
"Mae'r gymysgfa o ddysgu gweithredol ac academaidd yn rhoi sylfaen gynhwysfawr iddynt ym mhob maes plismona.
"Rwyf yn gwybod maint gwaith caled ac ymroddiad y swyddogion hyn. Rwyf yn dymuno'r gorau oll iddynt yn eu gyrfaoedd newydd."
Dywedodd Martina Feilzer, Deon Coleg y Celfyddydau, Dyniaethau a Busnes: "Llongyfarchiadau i'r cohort cyntaf o gwnstabliaid heddlu sy'n graddio o Fframwaith Cymwysterau Addysg yr Heddlu sy'n gydweithrediad rhwng Prifysgol Bangor a Heddlu Gogledd Cymru.
"Mae ein hymroddiad i Brentisiaethau Gradd Cwnstabliaid Heddlu a'r Rhaglen Mynediad i Raddedigion wedi gweld newid mawr mewn addysg broffesiynol a phlismona gweithredol, gan gydnabod sgiliau a galwadau gweithwyr proffesiynol heddiw'r heddlu.
"Daw'r bartneriaeth gydweithredol hon â manteision mawr nid yn unig i'n sefydliadau ond i'r cymunedau a wasanaethwn."
Ychwanegodd Dr Tim Holmes, Uwch Ddarlithydd mewn Troseddeg a Phlismona ym Mhrifysgol Bangor: "Rydym yn falch o'n cohort cyntaf o fyfyrwyr i raddio o'r rhaglenni PEQF. Mae eu hamynedd wrth i ni ddatblygu'r graddau newydd a'u gwaith caled a'u hymroddiad yn tystio eu proffesiynoldeb.
"Rydym hefyd yn ddiolchgar am y gwaith partneriaeth da gyda chydweithwyr yn adran hyfforddiant Heddlu Gogledd Cymru."
