Denu talent yn ôl adref
“Dewch yn ôl // Rhowch yn ôl” – dyma neges ymgyrch newydd sy’n cael ei lansio gan barc gwyddoniaeth blaenllaw ar Ynys Môn yr wythnos hon.
Nod ymgyrch mewn bartneriaeth â Bwrdd Uchelgais Gogledd Cymru, Llwyddo’n Lleol, Cyngor Gwynedd, Darogan Talent, Global Welsh, a Phrifysgol Bangor, yw hyrwyddo’r cyfleodd sydd ar gael yng ngogledd Cymru i bobl sydd wedi symud i ffwrdd ar gyfer eu haddysg neu waith. Bydd yn tynnu sylw at yr hyn sy’n gwneud yr ardal yn lleoliad delfrydol i fyw a gweithio, gyda’r gobaith o annog pobl i ddod yn ôl ac i gyfrannu at yr economi.
Mae Pryderi ap Rhisiart, Rheolwr Gyfarwyddwr M-SParc, yn egluro: “Rydym yn teimlo’n gyffrous iawn wrth lansio’r ymgyrch yr wythnos hon. Mae’n hen stori bod ardaloedd gwledig fel Môn, Gwynedd a Chonwy yn colli pobl ifanc wrth iddynt symud i ffwrdd ar gyfer addysg uwch a swyddi – gyda’r effaith mae hyn yn ei gael ar gymunedau yn ieithyddol ac yn gymdeithasol yn destun trafodaeth ers sawl cenhedlaeth. Dyma gychwyn y sgwrs felly, ymysg pobl yma yn lleol ac ymysg rhai sydd wedi gorfod gadael, ond sy’n dyheu i ddod 'nôl
“Ein bwriad ydi ceisio newid y gred gyffredin nad oes swyddi a chyfleusterau yma a dangos bod cyfleodd ar gael a hwyluso’r ffordd i bobl ddychwelyd. Gyda’n pobl ifanc yn aros draw mae’n golygu bod gogledd Cymru yn cael ei hamddifadu o dalent a sgiliau a hynny ar adeg pan mae eu gwir angen. Roedden ni’n teimlo felly bod yr amser yn iawn am ymgyrch fel hyn.”
Ail elfen yr cynllun yw ceisio annog pobl sydd wedi bod yn llwyddiannus mewn busnes neu ym myd gwaith y tu hwnt i ffiniau gogledd Cymru i ystyried rhoi yn ôl er mwyn cefnogi busnesau newydd yr ardal. Gyda chyswllt â Chymry ym mhob rhan o’r byd mae partneriaid yr ymgyrch yn gwneud apêl i bobl gofrestru diddordeb i gyfrannu o’u hamser i fentora neu i fuddsoddi yn ariannol i gefnogi mentrau newydd.
Un gŵr busnes sydd eisoes wedi symud yn ôl yw Billy Williams – sylfaenydd cwmni Cufflink, sy’n edrych ar y ffyrdd o storio gwybodaeth bersonol ar-lein. Yn wreiddiol o Amlwch, fe aeth Billy i Ysgol Syr Thomas Jones yn y dref, cyn gadael i fynd i’r brifysgol yn Huddersfield. Mae wedi gweithio ar hyd a lled y byd – o Lundain i’r Swistir, Dubai ac Awstralia. Ond, fel nifer, roedd yn awyddus i symud yn ôl i’w ardal enedigol i fagu teulu.
Dywedodd: “Ar ôl teithio am flynyddoedd, pan ddaeth y plant roeddwn i’n awyddus i ddod yn nes at adref i’w magu nhw, yn agos at fy nheulu ac mewn ardal ddwyieithog. Rwy’n credu nad oes ots bellach lle mae rhywun yn byw pan mae’n dod at waith. Mae gweithio o bell wastad wedi bod yn rhan bwysig i ethos ein cwmni ni ac yn dilyn y cyfnod diweddar efo Covid19, does erioed amser cystal wedi bod i adleoli i ardal mor braf a diogel.”
Mae Prifysgol Bangor yn rhan allweddol o’r cynllun, dywedodd yr Is-Ganghellor Iwan Davies: “Rydym yn ymfalchïo mewn rhwydwaith gref o gyn-fyfyrwyr ym Mangor. Mae ein graddedigion yn mynd allan i'r byd i ddefnyddio'r sgiliau maen nhw wedi'u dysgu yma yn y Brifysgol. Rydym eisiau sicrhau bod Cymry Cymraeg yn teimlo y gallant ddod yn ôl i'r ardal i fod yn rhan o ddyfodol y rhanbarth. Drwy M-SParc, sy’n gwmni Prifysgol Bangor, yn ogystal â thrwy gynlluniau cyffrous eraill, mae gyrfaoedd a chyfleoedd gwych yma ynghyd â’r sgiliau i sicrhau llwyddiant.”
Un sydd wedi cael cyfle i ddod yn ôl i weithio ydi Morgan Thomas o Fenllech. Wedi ei gyfnod yn Ysgol David Hughes, Porthaethwy aeth i Brifysgol John Moores yn Lerpwl i astudio Rheolaeth Busnes.
Mae’n egluro: “Rwyf newydd orffen fy ail flwyddyn yn y coleg ac ar fy mlwyddyn allan mewn diwydiant fel rhan o’r cwrs. Rydw i wedi bod yn lwcus i gael cyfle i weithio i Virustaticshield yn M-SParc am y cyfnod yma. Mae’r cwmni yn cynhyrchu’r gorchuddion wyneb gwrth-feirws ac felly wedi tyfu yn sgil y pandemig. Mae’n brofiad gwych, ac rydw i yn gobeithio ar ôl gorffen fy ngradd y medrai ddod yn ôl i’r ardal yn barhaol i wneud gradd meistr ym Mangor ac yna i weithio. Mae’r gwaith rydw i yn wneud rŵan efo Virustaticshield wedi dangos i mi fod cyfleoedd yma ac wedi agor fy llygaid i’r dechnoleg a’r cyfleusterau sydd ar gael ar fy stepen drws yma ar Ynys Môn.”
I gefnogi’r ymgyrch mae M-SParc wedi comisiynu Mark Richardson, o ‘Ffwligans’ i greu delwedd yn arbennig. Y gobaith yw y bydd y gwaith celf ynghyd â’r negeseuon yn tynnu sylw ac yn apelio at bobl ifanc i feddwl yn wahanol am yr ardal yng nghyd-destun gwaith a busnes.
Mae’r holl wybodaeth am “Dewch yn ôl // Rhowch yn ôl” a’r cyfleoedd cysylltiedig ar gael ar wefan M-SParc. Mae pobl sydd â diddordeb mewn bod yn rhan yn cael eu hannog i gysylltu gyda post@m-sparc.com neu i gofrestru ar y wefan http://www.m-sparc.com/cy/dewch-yn-ôl.
