Â鶹´«Ã½¸ßÇå°æ

Beth wnaeth eich ysbrydoli neu eich ysgogi i ddefnyddio'r offeryn/adnodd hwnnw?

Roeddwn eisiau deall tueddiadau ymgysylltu ymysg myfyrwyr dylunio cynnyrch fel rhan o fy ngham 2 PGCertTHE, yn benodol wrth ddysgu trwy gyfarwyddyd fideo i ennill sgiliau graffeg ddigidol. Roeddwn wedi sylwi bod gostyngiad wedi bod mewn cyrhaeddiad o fewn dosbarthiadau a oedd yn cael eu cyflwyno trwy fideo, ac roeddwn eisiau deall graddau'r gostyngiad hwn a'r hyn y gellir ei wneud i wella ymgysylltiad a chyrhaeddiad.

Beth oedd eich nod wrth ddefnyddio’r offeryn/adnodd hwn?

Drwy ddefnyddio Panopto, fy nod oedd defnyddio’r dadansoddeg dysgu sydd wedi’i hymgorffori i ennill dealltwriaeth o dueddiadau gwylio/ymgysylltu a chymharu’r data â chyrhaeddiad academaidd a chanlyniadau arolygon myfyrwyr. Y nod ar ôl casglu a dadansoddi’r data oedd gwneud gwelliannau i fformat a chyflwyniad cyfarwyddyd fideo o fewn Dylunio Cynnyrch.

I ba ddiben wnaethoch chi ddefnyddio'r offeryn/adnodd?

Y prif fetrigau a gasglwyd gan Panopto oedd amser gwylio a chwblhau fideo ar gyfer pob myfyriwr. Gellir allforio'r data hwn o Panopto gyda'r lefel gywir o fynediad, ond yn fy achos i, es ati i fewnbynnu’r data â llaw yn y diwedd. Yna cymharwyd y data â chanlyniadau academaidd a ddangosodd gydberthynas rhwng amser gwylio a chwblhau fideo a marciau’r myfyrwyr. Roedd gostyngiad amlwg hefyd mewn amser gwylio a chwblhau fideo dros y 3 blynedd diwethaf, sy'n awgrymu bod arferion gwylio wedi newid. Helpodd y data a gasglwyd i fod yn sail i arolwg myfyrwyr manwl a thrafodaeth bellach cyn creu cyfres beilot o fideos.

Sut effeithiodd yr offeryn/adnodd ar eich addysgu?

Mae defnyddio Panopto i gyflwyno cyfarwyddyd ar sail fideo wedi fy ngalluogi i fonitro ac adolygu ymgysylltiad â chynnwys fideo, ac wedi darparu metrigau allweddol i ddeall sut mae fy myfyrwyr yn defnyddio’r platfform. Ar ôl cyfuno hyn ag adborth gan y myfyrwyr, rhyddhawyd fformat diwygiedig o fideos i'w hadolygu gan fyfyrwyr.

Roedd y newidiadau’n cynnwys: ·

• Hyd cyffredinol byrrach ·
• Defnyddio penodau a nodau tudalen o fewn Panopto i segmentu fideo ·
• Canllaw ysgrifenedig i gefnogi pob fideo i fodloni anghenion dysgu amrywiol ·
• Cyflymder cyfarwyddyd cyffredinol cyflymach

Cafodd y newidiadau effaith sylweddol ar foddhad myfyrwyr ac ymgysylltiad myfyrwyr â’r deunydd. Roedd data o'r arolwg yn dilyn y gyfres beilot o fideos yn dangos bod dysgwyr yn ffafrio fideos byrrach yn sylweddol, bod dysgwyr yn ei chael yn haws ymgysylltu â’r fideos byrrach, a bod y fideos byrrach yn ddefnyddiol wrth ddatblygu eu sgiliau. Trwy gymryd amser i ddadansoddi data hanesyddol a deall beth mae myfyrwyr ei eisiau, rwyf wedi gallu mireinio fy llif gwaith. Mae cael canllaw ysgrifenedig i gefnogi fideo, yn ei hanfod, yn gweithredu fel sgript fideo, sy'n golygu llai o doriadau ac ail-recordio.

Pa mor dda y perfformiodd yr offeryn/adnodd. A fyddech chi'n ei argymell?

Mae Panopto yn llwyfan gwych i gyflwyno fideos oherwydd ei fod yn cysylltu â'ch modiwlau yn Blackboard. Mae'r llwyfan ei hun yn hawdd i staff a myfyrwyr ei lywio, ac mae'n cynnwys capsiynau aml-iaith. Mae’n hawdd recordio o fewn y platfform, ond oherwydd ei fod ar sail porwr, mae’r capasiti golygu’n gyfyngedig. Mae'r dadansoddeg sydd wedi’i ymgorffori wedi bod yn hynod werthfawr, er fy mhrif feirniadaeth yw nad yw'r adroddiadau a gynhyrchir yn awtomatig mor ddefnyddiol â hynny, ac roeddwn yn ei chael hi'n haws trawsnodi’r ffigurau yr oeddwn eu hangen â llaw - byddwch yn ofalus os oes gennych ddosbarthiadau sydd o fwy o faint!

Pa mor dda gafodd yr offeryn/adnodd ei dderbyn gan fyfyrwyr?

Mae dysgwyr wedi cyflwyno adborth hynod gadarnhaol ar y newidiadau a wnaed ac a gyflwynwyd trwy’r gyfres beilot o fideos. Roeddynt yn mwynhau'r fformat byrrach, y cyflymder cyflymach, y deunydd ategol ysgrifenedig a’r cymhorthion llywio megis stampiau amser a’r cynnwys yn Panopto. Mae'n anodd asesu gwir effaith y newidiadau a wnaed mewn perthynas â pherfformiad academaidd myfyrwyr a'r ymgysylltu hirdymor, ond yn seiliedig ar y derbyniad cychwynnol gan fyfyrwyr, maent yn llawer mwy tebygol o ymgysylltu â'r cynnwys yn y fformat hwn, ac mae tystiolaeth yn dangos cydberthynas rhwng ymgysylltiad a marciau uwch.

Rhannwch 'Awgrym Da' ar gyfer cydweithiwr sy'n newydd i'r offeryn/adnodd

Fy awgrym da ar gyfer addysgu trwy fideos yw: Adnabod eich cynulleidfa. Peidiwch â bod ofn cael trafodaethau anffurfiol neu ffurfiol gyda myfyrwyr, a darganfod beth maen nhw ei eisiau. Os ydych wedi datgysylltu â'r hyn y maen nhw ei eisiau a sut maen nhw'n dysgu, ni fyddant yn ymgysylltu â'r deunydd. Parhewch i adolygu ac ail-gyflwyno eich cynnwys gyda newidiadau gwybodus.

Sut byddwn chi'n crynhoi'r profiad mewn 3 gair?

Adnabod eich cynulleidfa.

Deunyddiau darllen a argymhellir:

Fyfield, M., Henderson, M., & Phillips, M. (2019). 25 principles for effective instructional video design. ASCILITE Publications, 418-423. 
Martin, N. A., & Martin, R. (2015). Would you watch it? Creating effective and engaging video tutorials. Journal of Library & Information Services in Distance Learning, 9(1-2), 40-56. 
Mayer, R. E. (Ed.). (2014). The Cambridge handbook of multimedia learning (2nd ed.). Cambridge: Cambridge University Press.

Cyswllt am ragor o wybodaeth:

Joshua Williams: josh.williams@bangor.ac.uk