Â鶹´«Ã½¸ßÇå°æ

Overview

Mae'r modiwl hwn yn cynnig cyfle i fyfyrwyr archwilio maes cerddoriaeth sy'n gysylltiedig â diddordebau ymchwil staff yn fanwl. Bydd myfyrwyr yn cymryd rhan mewn darlith a seminar wythnosol, yn ogystal â grŵp astudio dan arweiniad myfyrwyr sydd wedi'i gynllunio i fagu eich hyder wrth ddeall y pwnc a'r darlleniad cysylltiedig gan eich paratoi'n well ar gyfer trafodaethau yn yr ystafell ddosbarth. Mae'r pwnc a gynigir yn y modiwl hwn yn newid bob blwyddyn ac yn deillio o arbenigedd a diddordebau ymchwil staff. Mae rhai pynciau'n ymdrin â chyfansoddwyr penodol a/neu genres (megis 'Beethoven and the String Quartet' neu 'The Beatles'), tra bod eraill yn edrych ar draws sawl genre – clasurol a phoblogaidd (fel 'Cerddoriaeth a Sensoriaeth'). Gan gymryd y modiwl hwn byddwch yn dysgu amrywiaeth o sgiliau mewn meddwl beirniadol a dadansoddi, trafod, cyfathrebu, ymchwil a chydweithio. Mae dau asesiad. Cyflwyniad yw'r cyntaf (a all fod ar un pwnc neu fel rhan o ddadl ar thema), traethawd byr yw'r ail (y gellir ei gyflwyno fel sgript podlediad).

Mae'r union bwnc/bynciau yn newid o flwyddyn i flwyddyn. Nid yw'r rhestr o reidrwydd yn hollgynhwysfawr.

• Adfywiadau Cerdd
• Y Beatles
• Beethoven a'r Pedwarawd Llinynnol
• Cage a Cherddoriaeth Arbrofol
• Celfyddyd Serch Llys
• Y Ffidil yn Niwylliant y Byd
• Josquin a'i gyfoeswyr
• Ligeti
• Michael Nyman
• Minimaliaeth
• Symffoni'r 19eg Ganrif
• Tonyddiaeth Heddiw
• Tri Chyfansoddwr Cymreig Cyfoes: Metcalf, Samuel a Barrett

Mae'r pynciau'n amrywio o flwyddyn i flwyddyn. Fel arfer bydd y modiwl yn dechrau gyda chyflwyniad i'r pwnc, ac yna archwiliad manwl o agweddau arno, gyda chefnogaeth darllen cyd-destunol / gwrando a dehongliadau. Bydd yr union faes llafur yn newid yn dibynnu ar y pwnc, ond fel arfer bydd yn cynnwys agweddau fel:

• Cyd-destunau diwylliannol cyfoes
• deall y testunau cerddorol cysylltiedig (a'r cyd-destunau)
• derbyniad
• beirniadaeth

Assessment Strategy

Trydydd dosbarth: D- i D+ (40%-49%) Y cyflawniad hollbwysig yw arddangos gafael sylfaenol ar hanfod y pwnc, a'r math o ddeunydd dan sylw. Fodd bynnag, bydd y marc yn cael ei gyfyngu i'r lefel hon gan bethau fel: ailadrodd gwybodaeth heb ddangos dealltwriaeth go iawn; dryswch dadl sy'n dangos methiant i ddeall y deunydd yn iawn; methu gwahaniaethu'r perthnasol oddi wrth yr amherthnasol; methu gafael mewn syniadau; cynnwys gwallau ffeithiol; sgiliau llyfryddiaethol neu droednodi difrifol ddiffygiol; mynegiant gwael; tawedogrwydd llafar; cyflwyniad bratiog.

Ail Ddosbarth Is: C- i C+ (50%-59%) Y briodwedd sy'n cyfiawnhau marciau yn y categori hwn yw’r gallu i gywain corff cymedrol o ddeunydd perthnasol a gasglwyd o ystod tra eang o destunau neu ffynonellau gwybodaeth eraill, wedi'i ddidoli mewn trefn resymegol a'i fynegi'n ddeallus. Elfennau sy'n cyfyngu'r marc i'r lefel hon yw: dadleuon afresymegol, neu ddadl sy'n ddiffygiol mewn rhyw ffordd; llyfryddiaeth neu droednodiadau cyfyngedig neu ddiffygiol; dealltwriaeth gyfyngedig o syniadau neu ddadlau; tystiolaeth gyfyngedig o wybodaeth a dealltwriaeth eang o'r pwnc; ymwneud cyfyngedig â thrafod ac ail-negodi syniadau ar lafar; tystiolaeth gyfyngedig o feddwl o ddifrif, yn hytrach na dyfalbarhad syml.

Ail Ddosbarth Uwch: B- i B+ (60%-69%) Y briodwedd nodedig yw'r gallu i lunio dadl â ffocws sydd â thystiolaeth briodol. Mae'n debyg y bydd y gwaith felly'n dangos y gallu i ddeall trafod gwaith celf ac i gymhwyso'r wybodaeth honno i wahanol weithiau; cyfleu gwybodaeth a dealltwriaeth gyffredinol o'r pwnc yn ei gyfanrwydd, ac o wybodaeth a dealltwriaeth fanylach o feysydd penodol; sgiliau llyfryddiaethol a throednodi cymwys; cyfathrebu effeithiol o syniadau a dadlau; cyfraniad meddylgar at drafodaeth lafar; y gallu i weld problemau a gwrthddywediadau wrth ddarllen ffynhonnell; sgiliau wrth arsylwi a dadansoddi. Gall gwaith Ail Ddosbarth Uwch gynnwys llawer o'r un rhinweddau a’r rhai mewn gwaith Dosbarth Cyntaf, ond byddant yn cael eu dangos ar lefel llai annibynnol, neu gall y gwaith fod yn rhagorol mewn un nodwedd Dosbarth Cyntaf ond yn sylweddol ddiffygiol mewn un arall.

Dosbarth Cyntaf: A- ac A (70%-83%) Y briodwedd wahaniaethol yw’r gallu i arddangos tystiolaeth o feddwl deallusol ac annibynnol go iawn mewn trafodaeth barhaus. Mae'n debyg y bydd gwaith ar y lefel hon yn dangos menter wrth ymchwilio y tu hwnt i'r ffynonellau amlwg; y gallu i werthuso ffynonellau’n feirniadol; trafodaeth barhaus a rhesymegol; mynegiant rhugl wrth siarad ac ysgrifennu; y gallu i ddod â deunydd o ffynonellau anghydweddol at ei gilydd; sgiliau o radd uchel wrth arsylwi a dadansoddi; y gallu i ddefnyddio gwybodaeth i oleuo testunau cerddorol; arwyddion o wybodaeth eang y tu hwnt i gyfyngiadau cul y pwnc dan sylw; y gallu i arwain trafodaeth lafar; y gallu i adnabod ac wynebu problemau yn y pwnc, gwrthddywediadau mewn testunau, neu lacunae yn y dystiolaeth sydd ar gael.

Dosbarth Cyntaf: A+ i A** (84%-100%) Mae'r gwaith ar y lefel hon yn hynod wreiddiol ac o safon sy'n cyrraedd neu'n agosáu at safonau proffesiynol. Bydd y gwaith yn arddangos holl nodweddion categori A-/A (70%-83%) mewn modd cyson, a bydd o'r fath ansawdd fel ei fod yn fwy neu lai’n barod i’w gyhoeddi neu’i ddarlledu fel ag y mae, neu fel ei fod â'r potensial i'w gyhoeddi neu ei ddarlledu gyda diwygiadau yn y cyflwyniad.

Learning Outcomes

• Cyfathrebu syniadau ynglÅ·n â'r gerddoriaeth a astudiwyd mewn arddull sydd yn gymesurol â phrotocoliau cerddolegol proffesiynol.

• Cymhwyso sgiliau uwch o ddadansoddi cerddoriaeth, ymchwilio trwy ddefnyddio ffynonellau, meddwl yn feirniadol, a meddwl yn gysyniadol mewn perthynas â'r gerddoriaeth a astudiwyd.

• Dadansoddi syniadau a chysyniadau sy'n deillio o lenyddiaeth ysgolheigaidd sy'n ymwneud â phynciau penodol mewn hanes a diwylliant cerddoriaeth, a gallu gwerthuso hyn mewn perthynas â gwybodaeth ehangach.