�鶹��ý�����

Roedd y digwyddiad, a gefnogwyd gan y Gronfa Fenter, nid yn unig yn llwyfan i rwydweithio, ond hefyd yn hwyluso cysylltiadau ystyrlon rhwng myfyrwyr, arbenigwyr diwydiant ac arweinwyr busnes sefydledig. Darparodd sesiynau siaradwyr bont rhwng theori a rhoi’r theori hwnnw ar waith yn y byd go iawn, gan gynnig cipolwg ar heriau a buddugoliaethau entrepreneuriaeth.

Roedd uchafbwyntiau’r digwyddiad yn cynnwys pedwar siaradwr nodedig, pob un yn dod â phersbectif unigryw a mewnwelediadau amhrisiadwy i fyd entrepreneuriaeth:

Archwiliodd Stephen Davies, Prif Swyddog Gweithredol The Welsh Whisky Company Cyfyngedig, a’r grym y tu ôl i Ddistyllfa Penderyn, rôl ganolog creadigrwydd ac arloesedd wrth lunio llwyddiant rhyfeddol Penderyn.

Bu i Rhian Parry, Rheolwr-gyfarwyddwr Workplace-Worksafe, sôn am ei thaith entrepreneuraidd, am y gwersi amhrisiadwy a ddysgodd, ac am strategaethau i fynd i’r afael â rhwystrau, ynghyd â chyngor pragmatig ar sut i sefydlu menter gynaliadwy a llewyrchus.

Fe wnaeth Jeremy Smith, Cyd-sylfaenydd a Phrif Swyddog Gweithredol Neural River a Neural Voice ac alumni Ysgol Busnes Bangor, ganolbwyntio ar bwysigrwydd rhwydweithio a’i effaith ar ei daith entrepreneuraidd ei hun o raddio i dywys ei fusnesau ei hun tuag at ddyfodol o ddeallusrwydd artiffisial ac arloesi.

Bu i’r siaradwr olaf, Frankie Hobro, Perchennog Sw Môr Môn, bwysleisio sut mae ei hymrwymiad i gynaliadwyedd wedi ei sefydlu fel arloeswr, nid yn unig ym maes newid amgylcheddol ac eiriolaeth cadwraeth, ond hefyd ym myd busnes.

Dywedodd Siwan Mitchelmore, Cyfarwyddwr Cyflogadwyedd Ysgol Busnes Bangor: “Mae entrepreneuriaeth yn fwy na dim ond dechrau busnes; meddylfryd ydyw, ffordd o feddwl sy'n cofleidio ansicrwydd, risg, a cheisio rhagoriaeth. Mae'n ymwneud â throi syniadau yn realiti, gwthio ffiniau, a chreu atebion i fynd i'r afael ag anghenion ein byd sy'n newid yn barhaus. Mae'r meddylfryd entrepreneuraidd yn nodwedd werthfawr, sy'n cyfoethogi cyflogadwyedd myfyrwyr. Roedd y digwyddiad yn arddangos pedair taith entrepreneuraidd unigryw ac ysbrydoledig. Gadawodd y myfyrwyr â mwy o ysbryd entrepreneuraidd a bu iddynt elwa o’r cyfle i rwydweithio â chymuned o unigolion o’r un anian gyda’r awydd i wneud gwahaniaeth.”

Mae 'Adeiladu Pontydd mewn Entrepreneuriaeth' yn dyst i rôl ddylanwadol meithrin ysbryd entrepreneuraidd mewn lleoliadau academaidd, gan siapio arweinwyr y dyfodol ym myd busnes. Mae croeso i chi gysylltu â ni os hoffech gymryd rhan neu ymwneud mewn unrhyw ffordd mewn digwyddiad yn y dyfodol.