Â鶹´«Ã½¸ßÇå°æ

Mae maes gwleidyddiaeth yn newid o hyd, gyda phynciau gwleidyddol newydd yn cael eu rhoi ar yr agenda bob dydd. Mae hyn yn golygu bod astudio gwleidyddiaeth yn hynod ddiddorol. Gallwch drafod materion cyfoes a phethau sy'n effeithio ar bobl, heddiw ac yn y dyfodol, trwy ddysgu o'r gorffennol a chymryd rhan mewn dadleuon. Mae gwleidyddiaeth yn pennu llawer o’r hyn sy’n effeithio ar ein bywydau o ddydd i ddydd, a thrwy astudio gradd mewn gwleidyddiaeth, gallwch lunio’ch barn a pharatoi at yrfa lle gallwch effeithio ar bolisi ac ysgogi newid yn y byd yr ydym yn byw ynddo.

Mae astudio gwleidyddiaeth ym Mhrifysgol Bangor yn golygu y gallwch fabwysiadu agwedd ryngddisgyblaethol at y pwnc. Gallwch fanteisio ar y cyfle i archwilio gwleidyddiaeth trwy sawl ymagwedd, gydag ystod o fodiwlau sy'n ystyried materion gwleidyddol o safbwynt hanes gwleidyddol, athroniaeth, cymdeithaseg, polisi cymdeithasol, y gyfraith ac astudiaethau'r cyfryngau.

Ers 1999, mae gan Gymru ei llywodraeth ei hun, sy’n caniatáu ichi fyw mewn gwlad lle mae dadleuon gwleidyddol yn digwydd ar wahanol lefelau. Dewch i brofi sut beth yw byw mewn gwlad lle gallwch weld materion yr ydych yn eu trafod yn eich dosbarthiadau gwleidyddiaeth yn cael eu trafod yn lleol ac yn genedlaethol. Gallwch ddysgu o lygad y ffynnon sut beth yw byw ac astudio mewn gwlad sydd â llywodraeth ddatganoledig a sut yr ymdrinnir â pholisi a materion cenedlaethol megis iechyd, addysg a'r gyfraith.

Bydd astudio gwleidyddiaeth yn helpu i ddatblygu eich sgiliau cyfathrebu ysgrifenedig ac ar lafar, yn ogystal â’ch sgiliau dadansoddi, gwerthuso, a datrys problemau, trwy eich asesiadau a gweithgareddau allgyrsiol. Mae'r rhain yn sgiliau hynod drosglwyddadwy y mae galw amdanynt yn y byd gwleidyddiaeth ac ymysg llawer o broffesiynau eraill.

Mae gallu deall a dadansoddi sut mae llywodraeth a gwleidyddiaeth yn gweithio yn hanfodol ar gyfer gyrfaoedd yn y sector cyhoeddus a phreifat. Byddwch yn dysgu am heriau megis globaleiddio, yr hinsawdd, a materion cymdeithasol, ochr yn ochr â gwerthfawrogiad o brosesau hanesyddol llywodraeth a chymdeithas.